लेख्ने के,लेख्ने किन ?
लेख्ने के ?
सोच्दासोच्दै फुरेको सुन्दर विषय पनि गायब हुन्छ प्रायजसो । त्यसैले धेरै सोच्नु पनि प्रत्युत्पादक हो कि ठान्छु । फेरि नसोची त कसरी जाग्रित हुन्छ र अन्तर-मनको अभिव्यक्ति ? त्यसैले थोरै सोच्छु र केही लेख्छु भन्नु ठीक होला ।
लेखनको प्रारम्भ कसरी भोयो या गरेँ ? ठ्याक्कै सम्झना भएन भनूँ । तर एउटा घटना याद छ - 'जतिखेर संगीतले मेरो मनमा गहिरो जग हालिसकेको थिएन । गाउँको माटेघरमा थिएँ,९० सालको भूकम्पभन्दा पनि पुरानो रे । किसोर उमेर थियो । मनमा अनेक कल्पनाका लहर उठ्थे । त्यो दिन भने मन उदास थियो । किन ? खै ! थाहा छैन । छिनछिनमा सुस्केराका फोहोरा छुट्थे । सायद मैले त्यही दिनदेखि लेखनको थालनी गरेँ । एउटा कविताबाट ।
यसै घटनालाई आधार मानेर पहिलेदेखि भन्दै आएको छु र अहिले पनि भन्छु- म त आफ्नै उछ्वास लेख्दो रहेछु, उतिबेलादेखि नै । बेला त धेरै फेरिइसक्यो । तर उछ्वास अहिले पनि चलि नै रहेछ र सायद त्यही नै लेखिरहेछु ।
लेख्ने किन ?
सिधै भने भइगो'- उही उछ्वास पोख्न । सुस्केरा बिसाउन ।
तर त्यो र तीभन्दा पर पनि केही छ कि ?
त्यही छ कि भन्ने भ्रममा अल्झिएका हामी । केही न केही गरिरहन्छौं । त्यही केही गर्ने क्रमको एउटा क्रिया रहेछ - लेखन । तर लेखिसकेपछि यो मेरोमात्र उछ्वास हो भन्न पनि नमिल्ने रहेछ । यसभित्र अनेकौं अदृष्य पत्र खप्टिएका हुँदा रहेछन् । म आफूसितमात्र प्रतिबद्ध छु भन्नै नमिल्ने रहेछ ।
त्यसैले मैले अब भन्ने निधो गरेको छु- लेख्नुपूर्वको निजी प्रतिवद्धता भत्काउने हतियार रहेछ - लेखन । यस अर्थमा निजत्व भत्काउने कर्म रहेछ - लेखन । निजत्व भत्कनुको अर्थ नै सामुहिकताको आरम्भ हो नि ! भनिदिउँ न ! भन्दैमा के फरक पर्छ र ?
त्यही भत्कँदै गरेको निजत्वबाट उछिट्टिएका भावनाहरू यस पृष्ठमा सँग्रह गरेको छु । कविता, गीत , निबन्ध, नियात्रा जेका माध्यमबाट आए पनि यदि यिनले तपाईंसित सम्वाद कायम गर्न सके भने मेरो निजत्वले सामुहिकताको एउटा सानो अंश अंगाल्न थालेछ भन्ने सोच्छु ।
|
नेपाली आधुनिक गीत-संगीतमाथि अधारित रहेर सञ्चालन हुँदै आएको पलेँटी–शृंखला छैठौं वर्षमा चल्दैछ । नेपालयले सञ्चालन गर्दैआएको यस लघुसांगीतिक अभियानमा हालसम्म नेपाल र दार्जिलिङका धेरै, प्रतिष्ठित गायक, गायिका, गीतकार र संगीतकारको सहभागिता भइसकेको छ । २०१० को पलेँटीमा अरु धेरै कलाकार समेटिएका छन् । यस वर्षको पलेँटीमा उत्तर–पूर्वी भारत र भुटानका नेपालीभाषी कलाकार पनि संलग्न हुने क्रम निरन्तर छ । साथसाथै नेपाल र दार्जिलिङका थप सुप्रसिद्ध नेपालीभाषी गायक, संगीतकार तथा गीतकारहरूको निरन्तरता पनि कायम रहेको छ । नेपाली सिर्जनात्मक आधुनिक संगीतप्रति माया जगाउने लक्ष्य लिएर थालिएको यो अभियानमा श्रोता र दर्शकको रुपमा तपाईंको योगदानले नै मुख्य भूमिका निभाउँछ । |
|---|
Shaadi.com Indian Matrimonials